The Wall Street Journal (WSJ), është një gazetë amerikane me seli në Midtown Manhattan, New York City, botuar #sisot më 8 korrik 1889. Ajo ofron mbulim të gjerë të lajmeve, veçanërisht të biznesit dhe financave, dhe vepron sipas një modeli abonimi me pagesë për qasje në shumicën e artikujve dhe përmbajtjeve të tjera. WSJ botohet gjashtë ditë në javë nga Dow Jones & Company, një degë e News Corp.
Që nga viti 2025, The Wall Street Journal është gazeta më e madhe në Shtetet e Bashkuara për tirazhin e shtypur, me rreth 412,000 abonentë të formatit fizik dhe më shumë se katër milionë abonentë dixhitalë, i dyti më i madhi në vend pas The New York Times.
WSJ ka disa rubrika kryesore të cilat ndahen sipas fushave të interesit në botimet ditore dhe ato dixhitale, si:
Biznesi dhe Financat: mbulon lajmet e korporatave, tregjet financiare, analizat e sektorit bankar, teknologjisë dhe rubrikën e njohur Heard on the Street.
Tregjet: ofron të dhëna në kohë reale për bursat, obligacionet, lëndët e para (naftë, ar), dhe monedhat ndërkombëtare.
Lajmet ndërkombëtare dhe të SHBA-së: përfshin ngjarjet kryesore ndërkombëtare, politikën amerikane, dhe zhvillimet gjeopolitike.
Opinion: përmban editoriale, komente dhe këndvështrime mbi politikat ekonomike dhe çështjet aktuale.
Jeta dhe arti: përfshin kulturën, stilin e jetës, argëtimin, shkencën, si dhe rubrika për karrierën dhe investimet personale.
Real Estate & Mansion: Fokusohet në tregun e pasurive të paluajtshme luksoze.
Gjatë fundjavës, gazeta shton dhe rubrikat e veçanta si Review dhe Off Duty, të cilat përqendrohen te esetë, udhëtimet, ushqimi dhe moda.
Përgjatë historisë së saj, gazeta ka fituar 39 Çmime Pulitzer. Gazetarët e stafit që mbulojnë rubrikat më të rëndësishme të gazetës kanë botuar më vonë libra që përmbledhin dhe zgjerojnë raportimin e tyre.