Bibliotekat publike, kanë ndikim të drejtpërdrejtë në shoqërinë dhe kulturën e një vendi pasi shpesh janë burimi i vetëm i disponueshëm për kënaqësinë e nevojave intelektuale, informative dhe kulturore të përdoruesve. Ato janë kthyer tashmë në qendra intelektuale të jetës shoqërore me metodat tradicionale të mbështetjes së informacionit për aktivitetet e organizatave dhe institucioneve nëpërmjet akumulimit, klasifikimit dhe shpërndarjes së informacionit. Biblioteka publike “Qemal Baholli” është një institucion social integrues që mbledh, ruan dhe shpërndan dokumente të rëndësishme shoqërore me qëllim që të plotësojë dhe formojë nevojat e përdoruesve për informacion. Ajo siguron akses:

• social: shërbim për të gjitha kategoritë e popullsisë (nga fëmijët parashkollorë e deri në moshën e tretë);
• territorial: afërsia maksimale me përdoruesit (biblioteka ndodhet në qendër të qytetit) dhe përmes përdorimit të shërbimeve të tjera (biblioteka ambulante)
• në komunikim: përdorimi i formave aktive të promovimit të informacionit dhe dokumenteve tek përdoruesit.

Qëllimi i bibliotekës është të kontribuojnë në zhvillimin e përgjithshëm kulturor të përdoruesve dhe të plotësojnë nevojën e tyre të përditshme për informacion. Këtë gjë e realizon përmes blerjeve të një pjese të mirë të botimeve koherente në gjuhën shqipe dhe në gjuhë të huaj, rishikuar këto dhe sipas kërkesave të depozituara të lexuesve në kohë. Pas përpunimit, librat vihen në dispozicion të lexuesve dhe frekuentuesve, duke i huazuar ato në ambjentet e bibliotekës dhe jashtë saj.

Që në krijimin e bibliotekës, një zë i veçantë ka qenë pasurimi i saj nëpërmjet dhuratave. Të një rëndësie të veçantë janë librat e dhuruar nga akademikë, pedagogë, shkrimtarë elbasanas dhe më gjerë duke respektuar traditën e dhurimit në bibliotekën e qytetit të çdo libri të botuar nga autorë elbasanas.

Biblioteka Publike Elbasan shërben si qendër për trajnimin e të gjithë punonjësve të bibliotekave të shkollave të qarkut.