“Rrugëtimi i abetares dhe gjuhës shqipe ndër vite”
Punimi më i fundit i përgatitur nga drejtuesja e bibliotekës, znj. Manola Hatellari, dhe specialistja e fondit të albanologjisë, znj. Kozeta Grykshi, i kushtohet abetareve dhe librave të gjuhës shqipe të botuara gjatë një periudhe më shumë se 100-vjeçare.
Të dyja autoret, me një përvojë të gjatë dhe të vyer në fondin më të rëndësishëm të bibliotekës sonë – fondin e albanologjisë – kanë vërejtur pasurinë e madhe të botimeve të lidhura me gjuhën shqipe. Kjo i shtyu ato të ndërmarrin punën për realizimin e një monografie të veçantë, ku renditen dhe analizohen këto materiale me vlerë të madhe jo vetëm gjuhësore, por edhe kombëtare dhe arsimore.
Monografia “Rrugëtimi i abetares dhe gjuhës shqipe ndër vite” evidenton gjithashtu një numër të konsiderueshëm personalitetesh të shquara të gjuhësisë, albanologjisë dhe kulturës shqiptare në përgjithësi, të cilët kanë lënë gjurmë në historinë e shkrimit dhe mësimdhënies së gjuhës shqipe.
Ky botim vjen si një kontribut i çmuar për studiues, pedagogë, studentë, nxënës dhe të gjithë ata që kërkojnë të thellojnë njohuritë mbi historinë dhe zhvillimin e mësimdhënies së shqipes. Ai do të shërbejë si një burim i vyer informacioni dhe reflektimi për rëndësinë e gjuhës amtare në ndërtimin e identitetit kombëtar.